Əli Əmirov

Əli Əmirov
Əli Əmirov
Azərbaycan Kommunist Partiyası Mərkəzi Komitəsinin sənaye üzrə katibi
	fevral 1962 – 12 mart 1971
Birinci katib	Vəli Axundov; Heydər Əliyev
Şəxsi məlumatlar
Doğum tarixi	25 mart 1915
Doğum yeri	Naxçıvan, Naxçıvan qəzası, İrəvan quberniyası, Rusiya imperiyası;
Vəfat tarixi	12 fevral 1979 (63 yaşında)
Vəfat yeri	Bakı, Azərbaycan SSR, SSRİ;
Dəfn yeri	Birinci Fəxri Xiyaban;
Partiya	Sovet İttifaqı Kommunist Partiyası (1945–1979);
Təhsili	Azərbaycan Dövlət Neft və Sənaye Universiteti (1940-cı ilədək);
Elmi fəaliyyəti
Elmi dərəcəsi	texnika elmləri doktoru;
Təltifləri	;

Əli Cabbar oğlu Əmirov (25 mart 1915, Naxçıvan – 12 fevral 1979, Bakı) — Azərbaycan Kommunist Partiyası Mərkəzi Komitəsinin sənaye üzrə katibi katibi (1962–1971), texnika elmləri doktoru (1971), professor.

Həyatı

Əli Cabbar oğlu Əmirov Naxçıvan şəhərində anadan olmuşdur. "Neft yataqlarının işlənilməsi və istismarı" ixtisası üzrə Azərbaycan Sənaye İnstitutunu bitirdikdən sonra, 1940–1952-ci illərdə "Orconikidzeneft" trestində neft hasilatı ustasından trestin müdirinə qədər müxtəlif vəzifələrdə işləmişdir. 1952–1972-ci illərdə "Azərbaycan neft təsərrüfatı" jurnalının redaksiya kollegiyasının üzvü və redaktoru olmuşdur. 1955–1958-ci illərdə Azərbaycan SSR Neft Sənayesi Nazirliyində idarə rəisi, 1958–1959-cu illərdə Azərbaycan SSR neft sənayesi nazirinin müavini, 1959–1962-ci illərdə isə "Azneft" İstehsalat Birliyinin baş direktoru olmuşdur.

1962-ci ildə Azərbaycan Kommunist Partiyası Mərkəzi Komitəsinin sənaye üzrə katibi seçilmişdir. 1971-ci ildən "Azneft" İB baş mühəndisi işləmiş və "Qum adası", "Makarov b.", "Səngəçal-dəniz", "Duvannı-dəniz", "Bulla-dəniz" neft-qaz yataqlarının mənimsənilməsində bilavasitə iştirak etmiş və rəhbərlik etmişdir. Əmirov Ə. C. Azərbaycanın Mədəni əlaqələr cəmiyyətinin vitse-prezidenti olmuşdur. 1977-ci ildə o, Azərbaycan Neft və Kimya İnstitutunun "Neft yataqlarının işlənilməsi və istismarı" kafedrasında dosent, professor vəzifələrində işləmişdir.

Əli Əmirov 12 fevral 1979-cu ildə Bakı şəhərində vəfat etmiş, Birinci Fəxri Xiyabanda dəfn olunmuşdur. "Əli Əmirov" geoloji kəşfiyyat gəmisi onun adını daşıyır.

Elmi fəaliyyəti

Əli Əmirov neft və qaz yataqlarının işlənilməsi sahəsində tanınmış alimdir. O, 1959-cu ildə "Çox dərin quyuların istismarının bəzi ünsürləri (məsələləri)" mövzusunda namizədlik dissertasiyası müdafiə etmişdir. 1971-ci ildə "Dərin və çox dərin quyuların mənimsənilməsi və istismarının texnika və texnologiyasının bəzi problemləri" mövzusunda doktorluq dissertasiyasını müdafiə etmiş və texnika elmləri doktoru elmi adını almışdır.

Elmi tədqiqatların sahəsi: dərinlik nasosları ilə istismarın texnikası və texnologiyası, dərində yerləşən neft-qaz yataqlarının işlənilməsi problemi, neftin kompressor üsulu ilə hasilatının təkmilləşdirilməsi məsələləri, Azərbaycan neft mədənlərinin avtomatlaşdırılması üçün sistemlərin və vasitələr kompleksinin yaradılması və tətbiqi.

Əli Əmirov 140-dan artıq elmi məqalənin və bir sıra monoqrafiyaların müəllifidir.

O, "SSRİ fəxri neftçisi" adına layiq görülmüşdür. SSRİ Dövlət mükafatı laureatı (1969) olmuşdur. "Qırmızı əmək bayrağı" ordeni ilə mükafatlandırılmış və İ. M. Qubkin adına mükafata layiq görülmüşdür.