Azadlıq (qəzet)

Azadlıq qəzeti
Növ	Gündəlik ictimai–siyasi qəzet
Format	A3
Təsisçi	Qəzetin kollektivi
Baş redaktor	Qənimət Zahid
Yaranma tarixi	24 dekabr 1989
Dil	Azərbaycan dili
Qiymət	50 qəpik
Baş ofis	Bakı
Ünvan	Bakı, Mətbuat prospekti, 529-cu məhəllə, 9-cu mərtəbə.
Ölkə	Azərbaycan
Tiraj	7 500
azadliq.info
Vikianbarda əlaqəli mediafayllar

"Azadlıq" – 1989–2016-cı illərdə Azərbaycanda çap edilmiş gündəlik ictimai–siyasi qəzet. 2002-ci ildən həm də, 2016-cı ildən isə sadəcə onlayn fəaliyyət göstərir.

"Azadlıq" qəzeti 1989-cu ildə Azərbaycan Xalq Cəbhəsi Partiyasının həftəlik nəşri kimi yaradılıb. İlk sayı həmin il dekabrın 24-də işıq üzü görüb. Qəzetin ilk redaktoru Nəcəf Nəcəfov olub (1989–1991).

1991–1994-cü illərdə "Azadlıq"a Qənimət Zahid, 1994–2001-ci illərdə Gündüz Tahirli, 2001–2003-cü illərdə Rövşən Hacıbəyli rəhbərlik edib. 2003-cü ildən "Azadlıq"ın baş redaktoru Qənimət Zahiddir.

1989-cu ildən həftədə bir dəfə, 1991-ci ildən iki dəfə, 1992-ci ildən üç dəfə, 1996-cı ildən gündəlik (həftədə 5-7 dəfə) çıxan "Azadlıq" 2016-cı ilə qədər həftədə 6 dəfə çap edilib.

AXCP 2015-ci ilin sentyabrında qəzetin təsisçiliyindən imtina etsə də bu qərar Ədliyyə Nazirliyi tərəfindən qəbul olunmayıb.

2016-cı ilin sentyabrında çap fəaliyyəti tamamilə dayanıb, onlayn fəaliyyəti davam edir.

2017-ci il mayın 12-də isə Səbail Rayon Məhkəməsi qəzetin Azadliq.info saytına girişi məhdudlaşdıran qərar qəbul edib. Bakı Apellyasiya Məhkəməsi və Ali Məhkəmə həmin qərarı qüvvədə saxlayıb. Sayt Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Mərkəzinin iddiası ilə bloklanıb.

Qəzetin ilk sayı 8 səhifədən ibarət idi. Qəzetin loqotipi üstündə "El gücü – sel gücü!" yazılmışdır. Birinci səhifəsində Azadlıq meydanındakı mitinqdən foto, aşağı hissədə isə türk şairi Tofiq Fikrətin "Millət şərqisi" şeiri yerləşdirilmişdir. İkinci səhifədə Məhəmmədəmin Rəsulzadənin Lahıcda yazdığı "Haqsız qan yerdə qalmaz" məqaləsi və Azərbaycan Xalq Cəbhəsinin fövqəladə konfransının qətnaməsi dərc olunmuşdur. 3-cü səhifədə Xalq Cəbhəsinin sədri Əbülfəz Elçibəyin "Hürriyət olan yerdə insanlıq da olur" adlı müsahibəsi verilmişdir. İlk sayda həmçinin Ü. Hacıbəylinin "Duma yaxınlaşır", Vaqif Səmədoğlunun "Milli tənhalıqdan qurtulmalıyıq" adlı yazıları dərc olunmuşdur.

• Yeni Müsavat
• Bizim Yol
• Turan İnformasiya Agentliyi