Cəfərqulu Rüstəmov

Cəfərqulu Rüstəmov
Cəfərqulu Namaz oğlu Rüstəmov
Doğum tarixi	5 mart 1926(1926-03-05)
Doğum yeri	Daş Salahlı, Qazax qəzası, Azərbaycan SSR, ZSFSR, SSRİ
Vəfat tarixi	2 mart 2005(2005-03-02) (78 yaşında)
Vəfat yeri	Bakı, Azərbaycan
Dəfn yeri	Xırdalan qəbiristanlığı[d]
Vətəndaşlığı	SSRİ→ Azərbaycan
Həyat yoldaşı	Firuzə Muradova
Elm sahələri	arxeologiya, paleoqrafiya
Elmi dərəcəsi	tarix elmləri namizədi[d]
İş yerləri	AMEA Tarix və Etnologiya İnstitutu, Qobustan Milli Tarix-Bədii Qoruğu
Təhsili	Bakı Dövlət Universitetinin Tarix fakültəsi

Cəfərqulu Namaz oğlu Rüstəmov (5 mart 1926, Daş Salahlı, Qazax qəzası – 2 mart 2005, Bakı) — Azərbaycanlı tədqiqatçı alim, arxeoloq.

Cəfərqulu Namaz oğlu Rüstəmov 5 mart 1926-cı ildə Azərbaycan Respublikasının Qazax rayonunun Daş Salahlı kəndində anadan olmuşdur. 1951-ci ildə Azərbaycan Dövlət Universitetinin (indiki BDU) Tarix fakültəsini bitirmişdir.

Cəfərqulu Rüstəmov ilk elmi fəaliyyətinə Azərbaycan Milli Elmlər Akademiyası Tarix institutunun Paleolit-Arxeoloji ekspedisiyasında başlamışdır. Paleolit dövründən orta əsrlərə qədər aid edilən bir çox arxeoloji abidələrin qazıntı və tədqiqatında iştirak etmişdir. Qobustan qayaüstü təsvirlərini ilk dəfə aşkar etmiş və dünyaya tanıtmış arxeoloq, alim İshaq Cəfərzadənin işini davam etdirmişdir. O, həyat yoldaşı Firuzə Muradova ilə birlikdə 1965-ci ildən ömrünün sonuna qədər Qobustan ərazisində qazıntılar və tədqiqatlar aparmış, bu əraziləri qarış-qarış öyrənərək yeni abidələr və təsvirlər aşkar etmişdir. Cəfərqulu Rüstəmov 1966-cı ildə dövlət tərəfindən yaradılmış Qobustan Dövlət tarixi-bədii qoruğunda 1976-cı ilədək direktor vəzifəsində çalışmışdır. Onun rəhbərliyi ilə Qobustan qoruğunun yaxınlığında yerləşən Şıxqaya və Şonqar dağlarının ərazisində üst paleolit, neolit və eneolit dövrlərinə, orta əsrlərə aid yüzlərcə qayaüstü təsvirlər, qədim yaşayış məskənləri, kurqanlar aşkar edilmiş və dövlət mühafizəsinə götürülmüşdür. Cəfərqulu Rüstəmov 200-dən artıq məqalənin, kitabça və bukletin, "Qobustan dünyası" və 3 cildlik "Qobustan petroqlifləri" elmi əsərlərinin müəllifidir. Onun "Qobustan qayaüstü təsvirləri (Kiçikdaş)" monoqrafik əsəri 2008-ci ildə çap olunmuşdur.