Fotoelement — (günəş elementi, fotovoltaik elementlər) üzərinə düşən işığı udaraq elektrik cərəyanı (fotocərəyan) və ya foto-elektrik hərəkət qüvvəsi yaradan elektrik cihazıdır. İş prinsipi fotoelektrik emissiyası və ya xarici fotoeffekt hadisəsinə əsaslanır. Fotoelektron emissiyası əsasında işləyən fotoelement vakuum yaradılmış və ya qazla doldurulmuş şüşə və ya kvars kolba daxilində yerləşdirilmiş 2 elektroddan — fotokatod və anoddan ibarət elektrovakuum cihazıdır. Fotokatodun üzərinə düşən işıq seli onun səthində fotoelektron emissiyası yaradır; fotoelement dövrəsi qapanarkən orada işıq selinə mütənasib fotocərəyan yaranır. Qazla doldurulmuş fotoelementdə qazın ionlaşması və qeyri-müstəqil boşalma nəticəsində fotocərəyan güclənir. Daxili fotoeffekt əsasında işləyən fotoelement eynicinsli elektron-deşik keçidli (p–n keçidli) yarımkeçirici, heterokeçidli və ya metal-yarımkeçirici kontaktlı yarımkeçirici cihazdan ibarətdir. Belə fotoelementdə optik şüalar udulur, yükdaşıyıcıların konsentrasiyası artır və elektrik hərəkət qüvvəsi yaranır.
Fotoelementlər, adətən, şüalanma və ya işıq qəbulediciləri funksiyasını yerinə yetirir. Yarımkeçirici fotoelementlərdən günəş batareyalarında və fotoelektrik generatorlarında günəş enerjisini birbaşa elektrik enerjisinə çevirmək üçün istifadə olunur. Fotoelement avtomatika, telemexanika, fotometriya, ölçmə texnikası, metrologiya, kosmonavtika, fototexnika, kinotexnika və digər sahələrdə tətbiq edilir.
- Günəş enerjisi
- Rusiya ixtiraları
- ABŞ ixtiraları
- Fiziki kimya
- XX əsrin ixtiraları
- Enerji çevrilməsi
- Yarımkeçirici cihazlar