Soltan Hacıbəyov

Soltan Hacıbəyov
Soltan Hacıbəyov
Azərbaycan Dövlət Konservatoriyasının rektoru
	1969 – 1974
Əvvəlki	Cövdət Hacıyev
Sonrakı	B. Məmmədova
Şəxsi məlumatlar
Doğum tarixi	8 may 1919
Doğum yeri	Şuşa, Şuşa qəzası, Gəncə quberniyası;
Vəfat tarixi	19 sentyabr 1974 (55 yaşında)
Vəfat yeri	Bakı, Azərbaycan SSR, SSRİ;
Dəfn yeri	Birinci Fəxri Xiyaban;
Partiya	Sovet İttifaqı Kommunist Partiyası;
Təhsili	Bakı Musiqi Akademiyası;
Fəaliyyəti	dirijor, bəstəkar, pedaqoq, pianoçu, musiqi pedaqoqu
Uşağı	İsmayıl Hacıbəyov;
Dini	İslam
Təltifləri	;
	Vikianbarda əlaqəli mediafayllar

Soltan İsmayıl oğlu Hacıbəyov (8 may 1919, Şuşa – 19 sentyabr 1974, Bakı) — Azərbaycan bəstəkarı, dirijor, pedaqoq, professor (1964), SSRİ xalq artisti (1973). O, Azərbaycan Dövlət Filarmoniyasının bədii rəhbəri (1948–1956) və direktoru (1955–1962), Azərbaycan Bəstəkarlar İttifaqının katibi (1953–1968) və Azərbaycan Dövlət Konservatoriyasının rektoru (1969–1974) vəzifələrində çalışmışdır.

Həyatı

Soltan Hacıbəyovun xatirə lövhəsi (Bakı)

Soltan Hacıbəyov 1919-cu il mayın 8-də Şuşa şəhərində anadan olmuşdur. 1930-cu ildə ikiillik ibtidai məktəbi bitirdikdən sonra Bakıya köçmüş, 1936-cı ildən etibarən əmisi Üzeyir Hacıbəyovun ailəsində yaşamışdır.

Orta təhsilini tamamladıqdan sonra Bakı Musiqi Texnikumunun truba sinfinə (A. Kolpinskinin sinfi) daxil olmuşdur. 1939-cu ildə texnikumu bitirərək Azərbaycan Dövlət Konservatoriyasının bəstəkarlıq fakültəsinə, Boris Zeydmanın sinfinə (musiqi nəzəriyyəsi üzrə müəllimi N. Şumakov) qəbul olmuş və 1946-cı ildə oradan məzun olmuşdur. Konservatoriya tələbəsi olduğu illərdə Bakı Musiqili Komediya Teatrının orkestrinə dirijorluq etmişdir.

1940–1942-ci illərdə M. Maqomayev adına Azərbaycan Dövlət Filarmoniyasının nəzdində fəaliyyət göstərən Sazçı Qızlar Ansamblına rəhbərlik etmişdir. 1942–1945-ci illərdə isə Bakı Filarmoniyası Orkestrinin bədii rəhbəri (1947-ci ildən isə direktoru) vəzifəsində çalışmışdır. 1948-ci ildən Azərbaycan Dövlət Filarmoniyasının bədii rəhbəri (1955–1962-ci illərdə direktoru), Azərbaycan Dövlət Konservatoriyasında müəllim, 1965-ci ildən professor, 1969-cu ildən isə rektor vəzifəsində fəaliyyət göstərmişdir.

1953-cü ildən Sovet İttifaqı Kommunist Partiyasının (SİKP) üzvü olmuşdur.

Soltan Hacıbəyov 1974-cü il sentyabrın 19-da Bakı şəhərində vəfat etmiş, Birinci Fəxri Xiyabanda dəfn olunmuşdur.

Mükafatları

Stalin mükafatı (II dərəcə) (1952) — M. F. Axundov adına Azərbaycan Dövlət Opera və Balet Teatrında "Gülşən" baletinə görə
"Azərbaycan SSR əməkdar incəsənət xadimi" fəxri adı (26 aprel 1958)
"Qırmızı əmək bayrağı" ordeni (9 iyun 1959, 19 may 1969)
"Azərbaycan SSR xalq artisti" fəxri adı (24 may 1960)
Azərbaycan SSR Dövlət mükafatı (29 sentyabr 1970) — simfonik orkestr üçün konsertə görə
"SSRİ xalq artisti" fəxri adı (26 iyul 1973)

Xatirəsi

Sumqayıt Musiqi Kolleci və Abşeron rayonunun Mehdiabad qəsəbəsindəki küçələrdən biri Soltan Hacıbəyovun adını daşıyır.
Bakıda yaşadığı binanın fasadına xatirə lövhəsi vurulmuşdur.
Soltan Hacıbəyovun anadan olmasının 100 illiyi Azərbaycan prezidenti İlham Əliyevin 2019-cu il tarixli sərəncamı ilə dövlət səviyyəsində qeyd edilmişdir. Sərəncama əsasən, Azərbaycan Respublikasının Mədəniyyət Nazirliyi və Azərbaycan Bəstəkarlar İttifaqı tərəfindən bəstəkarın yubileyinə həsr olunmuş tədbirlər planı hazırlanaraq həyata keçirilmişdir.