Elçin Mirzəbəyli

Elçin Mirzəbəyli
VII çağırış Azərbaycan Respublikası Milli Məclisinin deputatı
Vəzifədədir
23 sentyabr 2024-cü ildən
Seçki dairəsi	2024 — 90 saylı Ağsu Seçki Dairəsi
Əvvəlki	Tahir Kərimli
Ədalət, Hüquq, Demokratiya Partiyasının ictimai-siyasi əlaqələr üzrə katibi
16 mart 2024 – 29 sentyabr 2025
Sədr	Qüdrət Həsənquliyev
Əvvəlki	Vəzifə təsis edildi
Sonrakı	Azər Qasımov
Bütöv Azərbaycan Xalq Cəbhəsi Partiyasının ictimai-siyasi məsələlər üzrə katibi
30 aprel 2018 – 16 mart 2024
Sədr	Qüdrət Həsənquliyev
Sonrakı	Vəzifə ləğv edildi
Bütöv Azərbaycan Xalq Cəbhəsi Partiyasının beynəlxalq məsələlər üzrə katibi
12 avqust 2005 – 30 aprel 2018
Sədr	Qüdrət Həsənquliyev
Azərbaycan Mətbuat Şurası İdarə Heyətinin üzvü
Vəzifədədir
10 mart 2018-ci ildən
Azərbaycan Yazıçılar Birliyi İdarə Heyətinin üzvü
Vəzifədədir
26 oktyabr 2022-ci ildən
Şəxsi məlumatlar
Doğum tarixi	12 avqust 1967(1967-08-12) (58 yaş)
Doğum yeri	Lənkəran, Lənkəran rayonu, Azərbaycan SSR, SSRİ
Partiya	Azərbaycan Xalq Cəbhəsi Partiyası (2002–2004), Ədalət, Hüquq, Demokratiya Partiyası (2004–2025)
Təhsili	Azərbaycan Dövlət Mədəniyyət və İncəsənət Universiteti
Fəaliyyəti	jurnalist, siyasətçi
Təltifləri

Elçin Əbdülrəhim oğlu Mirzəbəyli (12 avqust 1967, Lənkəran) — Azərbaycan siyasətçisi, deputatı və jurnalisti. O, Azərbaycan Milli Məclisinin VII çağırış deputatı və Azərbaycanın əməkdar jurnalistidir.

O, 2024-cü ilədək "Xalq Cəbhəsi" qəzetinin baş redaktoru olub.

12 avqust 1967-ci ildə Lənkəran şəhərində doğulub.

Azərbaycan Dövlət Mədəniyyət və İncəsənət Universitetini və Rusiya Dövlət Səhnə Sənətləri İnstitutunu (Sankt-Peterburq Teatr, Musiqi və Kinematoqrafiya İnstitutu) bitirib.

Azərbaycan Dövlət Mədəniyyət və İncəsənət Universitetində, Azərbaycan Mədəniyyət Nazirliyində müxtəlif vəzifələrdə çalışıb.

"Sevil" kinoteatrının direktoru, "Sara" TV-nin "Xəbər" departamenti direktorunun müavini və redaktoru, "Üç nöqtə" qəzetinin redaktoru olub. 2015–2017-ci illərdə Lider Televiziyasında "Geosiyasət" proqramının müəllifi və aparıcısı, 2017–2019-cu illərdə Xəzər TV-də gündəlik "Xəzər Aktual" proqramının aparıcısı olub. Azərbaycan Dövlət Televiziyasında (AzTV), "Space", "Sara" telekanalında müəllif proqramları ilə çıxış edib. Məhəmməd Füzulinin 500 illiyinə həsr olunmuş filmin rejissoru, Bəxtiyar Vahabzadə, Rüstəm Behrudi və digər görkəmli şəxslər haqqında çəkilmiş filmlərin müəllifi və rejissorudur.

Naxçıvan Dövlət Musiqili Dram Teatrında Nəriman Nərimanovun "Nadir şah" dramına quruluş verib. Quruluşçu rejissoru olduğu "Nadir şah" dramı paytaxt Bakıda və Azərbaycanın müxtəlif bəlgələrində, eləcə də Türkiyədə, İranda uğurla nümayiş etdirilib. Mədəniyyət Nazirliyində çalışdığı dövrlərdə bir çox dövlət tədbirlərinin ssenari müəllifi, rejissoru və redaktoru olub. Milli Azadlıq Hərəkatının marşı olan, hal-hazırda Azərbaycan Silahlı Qüvvələrində ifa olunan, orta ümumtəhsil müəssisələrində tədris edilən "Azadlıq" marşının müəllifidir. Şeirlərinə Abbas Əhməd, Xanım İsmayılqızı, Nailə Mirməmmədli, Hikmət Mirməmmədli, Hatəm Nəbioğlu və digər tanınmış musiqiçi və bəstəkarlar tərəfindən mahnılar bəstələnib. Bu mahnıların arasında Abbas Əhmədin ifa etdiyi "Ürəyim yanar" mahnısı daha çox populyarlıq qazanıb. Şeirləri, esseləri və publisistik məqalələri Azərbaycan, Türkiyə, İtaliya, Özbəkistan və Rusiyada nəşr olunub. 2006–2024-cü illərdə "Xalq Cəbhəsi" qəzetinin və eyniadlı saytın, 2010–2018-ci illərdə Azərbaycan və italyan dillərində yayımlanan "Via della Seta" (İpək yolu) jurnalının baş redaktoru olub. Azərbaycan Mətbuat Şurası İdarə Heyətinin, Azərbaycan Yazıçılar Birliyi İdarə Heyətinin üzvüdür.

2017–2024-cü illərdə Bakı Natiqlik Məktəbi İctimai Birliyinin sədri olub.

2003-cü ildə Azərbaycan Respublikası prezidentliyə namizəd Qüdrət Həsənquliyevin Azərbaycan Respublikası Mərkəzi Seçki Komissiyasında məşvərətçi səs hüquqlu üzvü olmuşdur.

2008-ci ildə Azərbaycan Respublikası Prezidentinin seçkilərində Bütöv Azərbaycan Xalq Cəbhəsi Partiyasının Azərbaycan Respublikası Mərkəzi Seçki Komissiyasında səlahiyyətli nümayəndələrindən biri olmuşdur.

2004–2013-cü illərdə Bütöv Azərbaycan Xalq Cəbhəsi Partiyası sədrinin beynəlxalq məsələlər üzrə müavini, 30 aprel 2018 – 16 mart 2024-cü illərdə Bütöv Azərbaycan Xalq Cəbhəsi Partiyası sədrinin ictimai-siyasi məsələlər üzrə müavini vəzifələrində çalışıb. 16 mart 2024-cü ildə keçirilən qurultayda partiyanın adı dəyişdirilib və Ədalət, Hüquq, Demokratiya (ƏHD) Partiyası adlandırılıb. O, həmin vaxtdan ƏHD Partiyası sədrinin ictimai-siyasi məsələlər üzrə müavini olub. Bu vəzifədən 29 sentyabr 2025-ci ildə azad edilib. O, 2025-ci ilin oktyabrın 13-də "müstəqil siyasi analitika ilə məşğul olmaq istədiyi" əsas gətirilərək ƏHD Partiyası sıralarından xaric edilib. Elçin Mirzəbəyli mediaya açıqlamasında qərardan xəbərsiz olduğunu, bu barədə mətbuatdan məlumat aldığını bildirib.

• "Bir gecənin tənhalığı" şeir kitabı.
• "İtirilmiş vaxtın adamı" şeir kitabı.
• "Poz bu sükutu" şeir kitabı.
• "Sevgi məktubları" şeir kitabı
• "Anamın duası" şeir kitabı

1. "Vicdan haqqı" — şeirlərindən istifadə olunub.

• 21.07.2010 — "Tərəqqi" medalı.
• 2013-cü ildə Beynəlxalq Türk Mədəniyyəti Təşkilatı TÜRKSOY-un Basın Onur Ödülünə (Mətbuat Şərəf Mükafatı) layiq görülüb.
• 2013-cü il iyulun 22-də Ali Media Mükafatı ilə təltif olunub. ^{[ölü keçid]}
• Azərbaycan Respublikasının Prezidentinin 2019-cu il 25 iyul tarixli sərəncamı ilə "Azərbaycan Xalq Cümhuriyyətinin 100 illiyi (1918-2018)" yubiley medalı ilə təltif olunub
• 22 iyul 2020 — Azərbaycan Respublikasının əməkdar jurnalisti
• 22 iyul 2025 — "Azərbaycan milli mətbuatının 150 illiyi (1875–2025)" yubiley medalı