Ələsgər Şahbazov

Ələsgər Abbas oğlu Şahbazov (1898, Bakı – 9 may 1973, Bakı) — Azərbaycan inqilabçısı və ictimai-siyasi xadimi.

1898-ci ildə anadan olub. Siyasi fəaliyyətə erkən yaşlarından başlayaraq 1917-ci ildən Rusiya Sosial-Demokrat Fəhlə Partiyasının (bolşeviklər) üzvü olmuşdur. 1919–1920-ci illərdə Azərbaycan Xalq Cümhuriyyətinin Milli Ordusunda xidmət etmiş, 1920-ci ildə isə Fəhlə-Kəndli Qırmızı Ordusunda siyasi işə cəlb edilmişdir. Həmin ildən etibarən Azərbaycan Kommunist (bolşeviklər) Partiyasının Mərkəzi Komitəsinin üzvü olmuşdur.

1923-cü ilin aprelindən Azərbaycan K(b)P Göyçay Qəza Komitəsinin, 1925-ci ildə isə Naxçıvan Diyar Komitəsinin məsul katibi seçilmişdir. 1929-cu ilin iyunundan Azərbaycan K(b)P Qarabağ Dairə Komitəsinin məsul katibi və eyni zamanda Ümumittifaq Kommunist (bolşeviklər) Partiyasının Zaqafqaziya Diyar Nəzarət Komissiyasının üzvü olmuşdur. Həmin ilin sentyabrından 1930-cu ilədək Azərbaycan SSR Mərkəzi İcraiyyə Komitəsinin katibi vəzifəsində işləmişdir.

1930-cu ildə Azərbaycanın Sənaye Kooperasiyası İdarə Heyətinin sədri olmuş, 1930–1932-ci illərdə Azərbaycan SSR Xalq Təsərrüfatı Ali Sovetinə rəhbərlik etmişdir. 1932-ci ildə Azərbaycan SSR xalq yüngül sənaye komissarı, 1933-cü ildə Gəncə iplik və toxuculuq kombinatının direktoru təyin edilmişdir. 1933–1935-ci illərdə Azərbaycan SSR Maşın-Traktor Stansiyasının siyasi bölməsinin rəisi, 1935-ci ildə Yardımlı Rayon Zəhmətkeş Deputatları Soveti İcraiyyə Komitəsinin sədri olmuşdur. 1937-ci ildə Azərbaycan K(b)P Zuvand Rayon Komitəsinin, həmin ilin iyunundan isə Lənkəran Rayon Komitəsinin birinci katibi seçilmişdir. 1937-ci ilin iyun–avqust aylarında paralel olaraq Azərbaycan Dövlət Kooperativini də idarə etmişdir.

1937-ci ilin avqustunda həbs edilmişdir. 1939-cu ildə 10 il müddətinə azadlıqdan məhrumetmə və əlavə olaraq 5 il müddətinə hüquqlardan məhrumetmə cəzasına məhkum olunmuşdur. 1941-ci ilin fevralında cəzası 8 ilə qədər azaldılmışdır. 1945-ci ilin avqustunda azadlığa buraxılmışdır.

1948-ci ildə yenidən həbs edilmiş, 1949-cu ilin yanvarında təkrar olaraq 10 il müddətinə azadlıqdan məhrumetmə cəzasına məhkum edilmişdir. 1955-ci ildə azadlığa çıxmışdır. Uzun müddət həbsxana həyatından sonra, 1956-cı ilin yanvarın 10-da Sovet İttifaqı Kommunist Partiyası üzvlüyü bərpa edilmişdir.

1967-ci ildə təqaüdə çıxmış, 1973-cü il may ayının 9-da vəfat etmişdir.

Tağı Şahbazinin qardaşıdır.