Əhəd Kərimov

Əhəd Kərimov
Əhəd Kərimov
Azərbaycan SSR Ali Soveti sədrinin müavini
	13 noyabr 1987 –
Sədr	Süleyman Rüstəmzadə; Elmira Qafarova
Azərbaycan Kommunist Partiyası Bərdə Rayon Komitəsinin birinci katibi
	14 dekabr 1985 – 1990
Əvvəlki	Rüstəm Səfərəliyev
Sonrakı	Yusif Allahverdiyev
Azərbaycan Kommunist Partiyası Ucar Rayon Komitəsinin birinci katibi
	oktyabr 1981 – dekabr 1985
Sonrakı	İrşad Əliyev
Azərbaycan Kommunist Partiyası Laçın Rayon Komitəsinin birinci katibi
	yanvar 1980 – oktyabr 1981
Əvvəlki	Muradxan Cabbarov
Sonrakı	Yaqub Məmmədov
Azərbaycan Kommunist Partiyası Şuşa Rayon Komitəsinin birinci katibi
	13 dekabr 1975 – 15 yanvar 1980
Əvvəlki	Qəşəm Aslanov
Sonrakı	Niyaz Hacıyev
Şuşa Rayon Zəhmətkeş Deputatları Soveti İcraiyyə Komitəsinin sədri
	iyun 1975 – dekabr 1975
Şəxsi məlumatlar
Doğum tarixi	1940
Doğum yeri	Umudlu, Mardakert rayonu, Muxtar Dağlıq Qarabağ Vilayəti, Azərbaycan SSR, SSRİ;
Vəfat tarixi	2006 (65–66 yaşında) və ya 2007 (66–67 yaşında)
Partiya	Sovet İttifaqı Kommunist Partiyası (1960–1991);
Təhsili	Bakı Dövlət Universiteti;
Fəaliyyəti	siyasətçi

Əhəd Əli oğlu Kərimov (1940, Umudlu, Muxtar Dağlıq Qarabağ Vilayəti – 2006 və ya 2007) — Azərbaycan ictimai-siyasi və partiya xadimi, Azərbaycan SSR Ali Soveti sədrinin müavini, Azərbaycan Kommunist Partiyası Şuşa (1975–1980), Laçın Rayon (1980–1981), Ucar Rayon (1981–1985) və Bərdə Rayon (1985–1990) komitələrinin birinci katibi, Azərbaycan SSR Ali Sovetinin X və XI çağırış deputatı.

Həyatı

Əhəd Əli oğlu Kərimov 1940-cı ildə indiki Ağdərə rayonunun Umudlu kəndində anadan olmuşdur. Çapar kənd orta məktəbini bitirdikdən sonra 3 il kolxozda işləmiş, Azərbaycan Dövlət Universitetinin Mexanika-riyaziyyat fakültəsinə qəbul olunmuşdur. Burada ikinci kursda oxuyarkən oxuduğu orta məktəbin Azərbaycan bölməsində müəllim işləmiş, bir ildən sonra əyani təhsilə keçərək əvvəlcə fakültə, sonuncu kursda isə universitetin komsomol təşkilatının katibi olmuşdur. Təyinatla Azərbaycan SSR Elmlər Akademiyasının Mexanika-Riyaziyyat İnstitutuna göndərilmiş, öz istəyi ilə Mərdəkandakı çətin tərbiyə olunan uşaqlar üçün açılmış xüsusi internat-məktəbdə bir il tərbiyəçi, üç il yarım isə direktorun tərbiyə işlər üzrə müavini işləmişdir.

Azərbaycan Pedaqoji İnstitutunun Xankəndidə filialı açılan zaman burada müəllim ştatı üçün keçirilən müsabiqədə iştirak etmiş və 1970-ci ildə institutun komsomol təşkilatının katibi seçilmişdir. 1971-ci il noyabr ayında Azərbaycan LKGİ Dağlıq Qarabağ Muxtar Vilayət Komitəsinin ikinci katibi seçilmiş, 1975-ci ilin iyununda Şuşa Rayon Zəhmətkeş Deputatları Soveti İcraiyyə Komitəsinin sədri, həmin ilin dekabr ayında isə Azərbaycan Kommunist Partiyası Şuşa Rayon Komitəsinin birinci katibi vəzifələrinə irəli çəkilmişdir.

1980-ci ilin yanvar ayında Əhəd Kərimov Azərbaycan KP Laçın Rayon Komitəsinin, 1981-ci ilin oktyabr ayında Ucar Rayon Komitəsinin, 1985-ci ilin dekabr ayında isə Bərdə Rayon Komitəsinin birinci katibi işləmişdir. Paralel olaraq 1987-ci ilin noyabr ayında Azərbaycan SSR Ali Soveti sədrinin müavini seçilmişdir. 1991-ci ildə Azərbaycan öz müstəqilliyini elan edəndə Ali Sovetdə həmin iclasa sədrlik edib.

Əhəd Kərimov 1960-cı ildən Sovet İttifaqı Kommunist Partiyasının üzvü olmuşdur. X və XI çağırış Azərbaycan SSR Ali Sovetinin deputatı seçilmiş, Ali Sovetin Xalq maarifi və elm komissiyasının üzvü olmuşdur.

Əhəd Kərimov 67 yaşında vəfat etmişdir.